今仔日是七月半，中元普度 tsiah 有咧用 ê 祭品【摩訶 môo-honn】、【必桃 pit-thô】，拍算真濟人已經毋捌聽過--囉！相片內底是一粒「摩訶」kap 兩粒「必桃」鬥做一組，只一組是佇枋橋 ê 湳雅市仔買--ê ，一組 50 箍。
「摩訶粿」是普度 ê 時，一種無包餡 ê 粿，俗語講：【土鬼食摩訶欲討餡。 Thóo-kuí tsia̍h môo-honn berh thó ānn.】是咧譬相(phì-siùnn)人「戇呆、悾歁」；「摩訶」ê 漢字也有人寫做「毛呼」、「毛荷」、「毛風」、「摩風」，民間 ê 書寫文字計是借音字，「摩訶」應當是來自梵文 ê「maha」，意思是「great」，圓滿及宏大，乃宇宙之源 ê 形容詞；「訶」--字，泉腔《彙音》無收，《當代泉州音字彙》記「ho」，漳腔《十五音》記「o、ho、hô、honn」四音，「honn」釋義「娑婆—梵語也」，【摩訶 môo-honn】權算是借自梵文 ê 閩南語外來詞。
阮鹿港在早有一句話：「摩訶龜粿粽，紅包摕(thue̍h)來控(khàng)」，「khàng」--字本字不明，暫且用教育部 ê 替代字「控」。講是七--月普度 ê 時，司公會提帝鐘到每一口灶去巡筵(sûn-iân)，步頻計是三兩句咒語凊彩拂拂(hut)--咧，就欲共主家人伸手討紅，所致是咧拆斥(pâi-thik)司公人干焦想欲賺食，無影講盡家己司公 ê 本份正經咧唸咒語。只字「khàng」，我個人是用教育部「控」--字 ê 第三个釋意來解說(kué-serh)：『比喻想盡辦法、極力爭取他人的錢財或事物。』tsit 句俗話，外埠頭也有人講做「毛呼龜粿粽，紅包據（在）你送」。另有閣有兩句俗語：「土鬼仔食摩訶閣欲討餡」、「管煎軂軂、摩訶泡泡」。潘科元老師 pat 究勘過只个「honn」--字，伊認為咱四常咧講 ê「汝pat一箍honn？」，只个「honn」拍算就是指「毛呼」ê「honn」，用好兄弟仔咧「孝孤」ê「毛呼」，來供體(king-thué)無智識 ê 人，詳細 ê 內容會用得參考下面 ê 連結。
延伸閱讀：
李永球〈摩訶粿只可拜孤魂？〉http://news.sinchew.com.my/node/117119
潘科元〈普渡祭品「毛呼」〉http://blog.xuite.net/khoguan/blog/64182564