「地基主」就是進前 pat 徛佇咱只塊厝宅 ê 許(hí) hua̋i「先魂」，「許 hua̋i」表示額數是複數毋是單數，也就是講幾 lō 代 ê「先魂」，所致劉還月講臺灣 ê 地基主就是平埔族。
為著 berh 尊存只寡地靈，咱計會佇年節時攢飯菜來共亻因祭拜，阮塊是佇上元、清明、中元、冬節、年兜只五改，較工夫 ê 人家會拜到九改（另外四改是五月節、中秋、九月重陽參尾牙），佇年節 ê 前後十日以 lǎi 攏會用得祭拜。拜地基主上要緊--ê 就是愛「向內面拜」，有一寡人無瞭解地基主正確 ê 意涵，煞徛踮厝內向外口拜，逐家就愛知影一件代誌，向外口拜是咧拜「好兄弟仔」，毋是咧拜地基主。
只份金紙有佮使用說明，予現代人會用得加 pat 一寡知識，毋拄起先講：「地基主或說地居主」，這就有淡薄仔重耽--囉！若講地基主愛寫做「地居主」，按呢泉腔 ê 人就愛唸做「地"kir"主」或--者是「地"ku"主」，但是阮從(tsn̂g)到今佇鹿港聽--著--ê 計是「地"ki"主」，毋 pat 聽過「地"kir"主」，所致寫做「地基主」應該才是正確--ê。