鹿港普度歌：「初一放水燈，初二普王宮(king)，初三米市街，初四文武廟，初五城隍宮(siōng-king)，初六土城，初七七娘媽生，初八新宮邊......。」
初八「sin-33 king-33 pinn33」，外埔頭个人聽著即句，定定攏會叫是咧講「神經病」，茲(tse)是因為「新宮邊(sin-king-pinn)」三字个泉腔鹿港話計是陰平第一聲，無論本調、變調調值攏是中平調个「33」，臺灣普通腔部份偏泉个「神經病(sîn-king-pīnn)」，第五聲、第一聲个變調以及第七聲个本調，拄仔好嘛攏是中平調个「33」，致使鹿港話个「新宮邊」參臺灣普通腔略略仔偏泉个「神經病(pīnn)」完全sâng音。註：「新宮」是相對「舊宮」个稱呼，「舊宮」現主時个名號做「鹿港天后宮」，古早名做「聖母宮」；「新宮」正式个名稱是「勅(thik)建鹿港天后宮」，是嘉勇公福建安為著卜答謝天上聖母幫助清軍平定林爽文事件，佇乾隆53年(1788)所起--个，因為是新起--个，所致鹿港人叫做「新祖宮」、「新宮」，舊底个聖母宮就號做「舊祖宮」、「舊宮」。