紅嬰仔剃頭

       照咱ê例，乾埔(ta-poo)囝仔(kán-á)出世一月日做「滿月」，查某囡仔(tsa̋u-gín-á)「滿月」著愛減一日。滿月ê時愛熗(tshìng)油飯拜公媽，貺(hīng)親情、厝邊，若是親家，著愛貺一大模(bôo)雞卵糕猶是32粒粿（ex.紅圓）。有ê人嘛佇滿月只一日來剃頭，論真，剃頭ê日子並無定著，有十二日、十六日、二四日、滿月，現代人步頻(pōo-pîn)著愛上班食人ê頭路，嘛有看日撿一个「剃頭日」來剃頭，我大漢--ê是二四日剃頭，第二--ê就是看拜六剃頭日剃--ê。另外，若照阮塊(tèr)ê例，十二日愛閣熗一斗額ê油飯、捾一罐酒(ex.陳高)、煠(sa̍h)一隻雞、攢一千金參炮燭予媒人(hm̂-lâng)燒金。 

        剃頭進前愛攢予伊好勢ê物件，若照古例是真「厚草頭」，一寡禮俗文獻計有記載。我記錄現代做『胎毛筆』剃頭司所吩咐ê物件，已經改仔誠簡單--囉！雞卵兩粒、鴨卵兩粒、石頭兩粒、銀角仔六个、葱仔、芹菜。石頭是欲予囝仔ê頭較緊𠕇，銀角仔代表富貴，葱仔向望囝仔日後聰明(tshang-miâ)，「芹(khûn)」kap「勤」sâng音，剃頭司先摕(thue̍h)只tsua̋i物件佇囝仔ê頭殼頂、身軀頂講一寡好聽話，可比講「鴨卵身、雞卵面，好親情，來相伨(sann-thīn)。」講煞則開始剃頭。 

       古早人剃頭煞，閣會𤆬紅嬰仔去外口「喊覓鴞(hiàm-ba̍h-hio̍h)」，喙--nňg唸：「覓鴞飛上山，囝仔緊做官；覓鴞飛懸懸，囝仔中狀元；覓鴞飛下下(kě)，囝仔緊做老父(pě)。」古早人講「喊覓鴞」是咧共囝仔做膽。