今仔是年兜，照阮塊(tèr)个例，早起門聯若貼好，著愛開始攢牲醴踮廳頭燒金，頂桌比平素時閣加一對王梨蠟燭、一个香環(khuân)，用茶甌仔貯「春飯」，硩甜粿、發粿，許兩模大細模个發粿疊(tha̍h)佇甜粿頂懸，春飯參甜粿愛插「飯春」，一盤甜仁（紅--个是金、白--个是銀）參瓜子，頂桌雙爿邊--頭硩五粒海梨仔（抑是椪柑），若是臺北，多數人家是硩桶柑（年柑）；下桌中央在(tshāi)一盆花，三牲掛五果，三牲是左雞、中豬、右魚，雞頭向內、魚頭向外，五果今年是攢王梨、釋迦、茂柑、lìn-gooh、棗仔，三塊酒甌仔、一罐米酒，金紙攢一千金，點七欉香（阮二叔怹是點九欉香），先拜天公爐（三欉），即閣拜廳頭（三欉），路尾拜簷(tsînn)口媽（一欉），酒過三巡了後就會用得拆金紙囉！
廳桌頂个果子、發粿、甜粿，計是愛硩到初五隔開。除了廳頭一副牲醴，庄--裡个土地公嘛愛閣攢一副牲醴。廳頭燒金煞，隨愛閣攢飯菜落去拜公媽，若是往擺，飯菜愛閣加攢去拜「外家祖」。便若新正年頭，tsua̋i大魚大肉閣較按怎大食，嘛是消袂去。